Мен Шығыс Қазақстан облысы, Зайсан ауданы, Рожков (Біржан) ауылында дүниеге келдім. Кішкентайымнан әдебиетке құмар болып өстім.Оның үстіне, анамның ауылда газет-журналдарды таратушы болып еңбек еткендігі де әдебиетті оқуға, газет-журналдардағы әңгімелерді оқуға деген ынтамды арттырды. "Жалын", "Жұлдыз" журналдарын, "Дружные ребята" газетін қызығып оқитынмын.
Мектепте ең алғаш "Көркемтай" әңгімесін Ғалия апайымыз оқып бергенде, көзімдегі жасты тыя алмадым. Кейіннен Қарымсақова Риза, Әбдікенова Қарлығаш апайларымыз менің әдебиетке құшатралығымды оятты: талай сындарда байқауға қосты, қаламымды ұштады. Тағы бір айта кеткім келгені: орыс әдебиетінен Өкісханова Ғалия деген мұғалім апайымыз орыс әдебиеті классиктерінің шығармаларына қызықтырды. Әрі анам да менің орыс классиктерін оқуыма көп мән берді. Осы кезден бастап менің жалпы әдебиет атаулыға - көркем шығармаларды оқуға деген ынтам артты.
Мен институтта оқып жүргенде әдебиеттің майталмандарымен танысуыма Руда Зайкенова апайымыз себепкер болды.
Алматыда №147 мектеп-гимназияда ең алғаш мұғалімдік қызметімді бастағанда, Оразалиева Раушан Дүйсебейқызының "мектебінен" өттім. Жас мамандарды шынымен шынықтыратын ұстаз бола білді. Осы мектептегі алғашқы завучтар - Ажикова Күләш Қалаубайқызы мен Фатима апайлар нағыз жанашыр қамқор жандар болды. Аоғашқы тәлімгерлерім - Оспанова Айтжан мен Амантаева Ғалия да қазақ тілі мен әдебиетті оқытудан білгендерін аяған емес. "Қыздар, ең бірінші күн - өте маңызды. Оқушы бірінші күні сізді қалай қабылдайды - өмір бойы солай қабылдап өтеді" - деген Ғалия апайдың сөзі әлі де көкейімде.
Кейіннен ғылым жолын қуып, Ы.Алтынсарин атындағы Қазақ Білім Академиясына келгенде, Даулеталиева Роза Рақышқызының "мектебінен" өттім. Функционалдық сауаттылық дегенді сол кісі үйретті.
Отбасы жағдайымен Тараз қаласына көшіп келгенімізде, Жамбыл облыстық ерекше дарынды балаларға арналған "Дарын" мектеп-интернатына жұмысқа оңай қабылдандым: мектеп директоры А.Садықова білім мен іскерлікті бірінші орынға қойған шынымен де дарынды адам екен. Бұл мектепте мен Дусупова Жанылсын Мұқанқызының "мектебінен" өттім. Мектептегі басқару жүйесінің қыр-сырына осы жерде қанықтым. Орысша-қазақша аударма, функционалдық сауаттылық дегеннің бәрі осы кезде қажет болды. Жақсы нәтижелерге жеттім. Табысты болдым. Осы табысқа жетуіме әріптестерім П.Озықбаеваның, М.Баймолдинаның, Ш.Алтаеваның көп көмектері тиді.
Менің түсінгенім: мұғалімдік қызметке кез келген адам оңай келе бермейді. Егер адамда ынта мен алға құлшыныс болса, үйренуге құштар болса, алмайтын қамалы, аспайтын асуы жоқ.