Мен Кусаинова Гулизат Тулешевна, Мамай орта мектебінің технология пәнінің мұғалімі болып жұмыс істеймін.
Технология пәнін оқытуда еңбек етудің алғы шарттарын үйрету арқылы оқушыны жеке тұлға ретінде тәрбиелеу мақсаты көзделеді. Еңбек тәрбиесі барлық тәрбиенің кайнар көзі: тамақты пісіру, киімді пішу, тігу, тоқу, қолөнер шеберлігін меңгерту арқылы ұрпақты адамгершілік рухында тәрбиелей аламыз.
Технология пәнінің басты мақсаты – оқушылардың шығармашылықпен жұмыс жасауына ықпал ете отырып, қазіргі заманның технологиялық мәдениетіне яғни бұйымдарды көркем жобалауға, өңдеп, өндіруге бейімдеу болып табылады. Сондай-ақ оқушылардың техника мен технология әлемін зерттеп, зерделеуін, кәсіптік іс-әрекет элементтерінен практикалық тәжірибе алуын қарастырады.
Технология сабағы – тәрбие мен сүйіспеншілікті туғызатын сабақ. Мектепте технология сабағын халықтық педагогикамен ұштастырудың, сабақта халқымыздың қолөнерін үйрету арқылы оқушыларға ұлттық тәрбие берудің маңызы зор.